愛上即棄人（下）
上集：https://bit.ly/2AUAGrU
佢笑得好靚，好似天使一樣，但呢個世界原來咁殘酷，愈美麗嘅嘢就愈短暫。
知道真相後，我仲係好想幫阿晴。
哪怕我唔可以同佢一齊，作為我生命中第一個鍾意嘅女人，我都希望佢最後嘅日子過得開開心心。
我去即棄人公司度問，確定咗即棄人嘅生存期係無法被延長。
我又同阿晴講，不如我畀錢養佢，咁佢咪唔駛做兼職，可以專心體驗人生。
但阿晴拒絕咗，佢話佢做兼職，都係體驗人生嘅一部份。
我仲可以做啲咩？我訂造咗一個即棄人，同我一模一樣嘅即棄人。
我想呢個即棄人代我同阿晴一齊，我承認，我都有私心。
我將佢嘅生存期設定到同阿晴一樣，唯一嘅指令係：同阿晴拍拖，好好對阿晴。
阿晴初時係拒絕嘅，但我同佢講：「你想體驗人生，你就唔想體驗吓愛情咩？唔再係替身，而係真正愛你呢個人嘅愛情。」
阿晴唔出聲，我再將即棄人推到佢面前，並且表示，如果佢用唔著，我只可以拎個即棄人去銷毀。
我知道，我咁樣有啲卑鄙，或者喺阿晴心目中，我同大少爺嘅女朋友冇咩分別。
總之，阿晴最後都係接受咗，佢開始同我嘅即棄人拍拖。
自此之後，我就好少見到阿晴。
我都冇故意搵佢，怕自己對佢情根深種，三年後會好傷心。
不過，按我嘅要求，即棄人成日Send同阿晴合照畀我，望住佢同我一模一樣嘅臉，我都有少少安慰，好似我真係同阿晴拍緊拖咁。
如是者，好快過咗三年。
阿晴同我嘅即棄人都死咗。
我以為自己有晒心理準備，但知道呢個消息嗰一刻，我嚎啕大哭，痛不欲生。
我拎晒阿晴嘅相出嚟，逐張逐張睇，嘗試回憶我同佢嘅過去。
但我記得嘅事，實在太少太少，因為同佢經歷呢一切嘅，都唔係我，而係我嘅即棄人。
我曾經以為，我唔接近阿晴，佢死後我就唔會咁傷心。
但原來只要我愛佢，無論我哋相處咗幾多日，無論我哋嘅共同回憶幾咁少，我都一樣會傷心。
傷心之餘，仲有無盡嘅後悔。
點解當初我唔勇敢啲，堅持要同阿晴一齊？咁我就可以同佢有更多嘅回憶。
或者阿晴會拒絕，或者我今日會更傷心，但至少，我努力過。
我忽然記起，阿晴同我講過，佢只可以活一次，所以佢要盡力體驗人生。
我當時好同情佢，但依加諗番，我何嘗唔係「只可以活一次」？
即使我長命百歲，但一百年間，愛佢嘅機會，都只有一次。
每個人，都只可以活一次。
無論長短，好多時，愛一個人嘅機會，都只有一次，
錯過咗就冇㗎啦。
－完－
將專頁設定為「搶先看」/ "See first"，最新故仔馬上睇！
愛在戰爭之後：https://goo.gl/35AG67
夢想實現器：http://bit.do/fqitx
#短故 #短篇 #小說 #陳美濤 #廣東話 #粵語 #tomatochan #愛上即棄人
Search